ارسال

معاصر آذربایجان نثری نین آتاسی سایلان بویو ک یازیچی رحمتلیک استاد « گنجعلی صباحی » میابین

قلمی ایله تانیش اولماق اوچون اونون اوز ترجمه حالی اولان « اوتن گونلریم » آدلی کتابیندان نئچه بولوم

بوتون آنا دیلیمیزی وآذر بایجانین جنت گوشه سی اولان « میاب » کندینی سئونلره اتحاف ائدیرم.

.

............................................................................................................................

حیدر داییم جلفایا قدر بیزی« یولا سالمالی اولدو. مینیکلریمیزله داشلی یوللار ، دار جیغیر لارلا کندین شمالینا

طرف یوللاندیق .سکینه ننه م ایله من اولاغا مینمیشدیک .عمیم ایله داییم اولاقلاری هایلاییر،آنام دا اوز 

ایچی ایله الله شه الله شه اونلارین دالینجا آددیملاییردی. کندین شمالیندا یئرله شن «قیلینج »داغی ایله

«قانلی داغ» ین آراسینی کسن یولون باشینا یئتیشنده آنام دایاندی ،

دونوب حسرتله کنده طرف باخدیقدا ،گوزلری یاز بولودونا دوندو . بئله لیک له دوغما یوردوموز گورونمز اولدو.

.........................................................................................................................................

ایندی ایسه گورکملی بویوک یازیچی وافتخار میز « گنجعلی صباحی میابین » 7 یاشیندا عمیسی ایله

او تایا (اذربایجان شوروی) گئدیب و باشی قالمایان قالماقال چکندن سونرا وطنه گئری دونور .ایندی گلین 

بیرلیک ده «صباحی نین» اوزون ایللر غربتده یاشادیقدان سونرا اونون هیجان و دویغولارینی اوز دوغما دیارینا

دوننده اونون سئحرلی قلمیندن سوزولوب گلن کلمه لرده اوخویاق.اینانیرام کی سیز ده کووره له جکسیز !

....................................................................................................................................

«یئددی یاشیندا ، هله اوشاق ایکن عمیم، آناملا منی آرازین اوتایینا_شمالی آذربایجانا، آتامین یانینا

آپارمیشدی. ایندی قیرخ یاشیندا،ساچلاریما قار یاغمیش ، حیاتین ائنیش_یوخوشلاریندانکئچمیش ،

شیرینلیک_آجیلیقلاریندان دویونجا دادمیش ،ایستی_سویوقلارینی سوودوقدان سونرا ،آرزوسوندا اولدوغوم

دوغما یوردا، آنا وطنه دوغرو گئری دونورم.اوچدوغوموز طیاره نین یولو تهرانا دیر. من هله تهرانی

گورمه میشم ، آنجاق «قورخولو تهران» رومانیندا قلمه گتیریلمیش تهرانلا آز_چوخ تانیشلیغیم واردیر.

هر شئیدن آرتیق اوشاقلیق خاطره لریم یوخو کیمی ، گوزومون اونونده جانلانیر:

هر شئیدن اول دوغولدوغوم «میاب» کندینی خاطیر لاییرام. دورد بیر طرفدن اوجالان داغلارین 

آراسیندا یئرله شن صفالی کندیمیزی 

ساغ_سولوندا دوشموش باغلی_باغاتلی دره لر ، «گونئی داغی» و «قوزئی داغی»

«قیلینج داغی» ، «قانلی داغ »، اتکلرینی اورتن رنگ به رنگ عطیرلی گوللر، لاله لر،

تاخیل زمی لری ، یونجالیقلار ، آخشام چاغلاریندا چوللردن قاییدان قویون سورولری   ،

 قوزولارین مله شمه سی ایتلرین هوروشو ، داملاردا وورولموش اوت تایالاری

،حتی دار کوچه لرده پالچیق دیوارلارا ییلمیش تزه ک لر   بئله یوخو کیمی گوزومون اونونده جانلانیر.

میابین باشی اوزه رینده عظمتله باش گویلره قالدیر میش «قانلی داغا » بو آد هاردان قویولدوغونو

 ، هله ده بیلن یوخدور                                                                                                                                                   

کاش بو داغ دیله گلیب « میاب » کندی نین باشیندان کئچمیش قانلی فاجعه لری ، کیملر سینه سینده 

آت اوینادیب ، قانلار آخیتدیغینی آچایدی.

منبع: گنجعلی صباحی میاب ، اوتن گونلریم، صفحه 11 و 77   

ترتیب ائدن : ابوالفضل روزی طلب میاب در 93.10.30